AWS бұлты 39%-ға өсті: бес жылдағы ең жылдам қарқын
Тоқсан ішінде Amazon жабдық пен дата-орталықтарға $77,3 млрд жұмсады, бұл былтырғыдан екі еседен де көп.
Фото: Kevin Winter / Getty Images
Amazon 29 қазанда 2026 жылғы үшінші тоқсанның қорытындысын жариялады. AWS бұлттық бөлімшесінің түсімі 39%-ға өсіп, $46 млрд-қа жетті. Соңғы бес жылға жуық уақытта мұндай жылдам өсім болмаған. Алайда компанияның жалпы түсімі мен бір акцияға шаққандағы пайдасы талдаушылардың болжамынан төмен шықты. Сондықтан Amazon акциялары кешкі саудада шамамен 6%-ға арзандады.
Компания түсімі $201,9 млрд болды, бұл былтырғыдан 12%-ға көп. FactSet деректеріне қарағанда, талдаушылар $202,2 млрд күткен. Бір акцияға шаққандағы пайда $1,89 болды, ал болжам $1,97 еді. Ал AWS күткеннен жақсы нәтиже көрсетті: $45,29 млрд орнына $45,98 млрд.
Операциялық пайда $28,1 млрд-қа дейін өсті, операциялық маржа 13,9%-ға жетті. Бұл Amazon үшін рекорд. Осы пайданың 60%-дан астамын AWS берді: былтырғы $11,4 млрд орнына $17,8 млрд. Ал таза пайда $20,7 млрд-қа дейін азайды. Компания мұны былтыр есепке Anthropic-ке салған инвестициядан түскен $9,5 млрд бір реттік пайда енгенімен түсіндіреді.
Ақша дата-орталықтарға кетіп жатыр
Бұлттың өсуі арзанға түспейді. Тоқсан ішінде Amazon жабдық пен ғимараттарға $77,3 млрд жұмсады, бір жыл бұрын бұл сома $35,1 млрд болған. Нәтижесінде 12 айдағы еркін ақша ағыны $42,4 млрд-қа минусқа кетті. Былтыр компания $14,8 млрд плюста еді.
Amazon 2026 жылға әлі де шамамен $220 млрд күрделі шығын жоспарлап отыр. Компания президенті әрі бас директоры Энди Джасси инвесторлармен қоңырауда ақшаның басым бөлігі AWS-ке кететінін айтты. Ал 2027 жылы шығын «едәуір көп» болады.
Джасси салынған қаржы ақталады деп сендіреді. Оның сөзінше, AWS жылдық қарқынмен есептегенде қазір жылына $184 млрд әкеледі. 2027 және 2028 жылдары бөлімше 40%-дан астам өсуі мүмкін. «Жылдық түсімі триллион доллар болатын бизнес бұрын-соңды болған емес, ал бізде жақын 5–10 жылда ондай екі бизнес пайда болуы мүмкін», — деді ол.
Жасанды интеллектке сұраныс
Өсімнің басты қозғаушы күші — жасанды интеллект. Fortune 500 тізіміндегі ірі компаниялар Bedrock сервисіне былтырғыдан жеті есеге жуық көп ақша жұмсап отыр. Bedrock арқылы Anthropic, OpenAI және басқа әзірлеушілердің модельдерін қолдануға болады. Сервисте өңделген токендер көлемі 17 есеге жуық өсті. Сонымен қатар Amazon кодты өзінің Trainium жасанды интеллект үдеткішіне көшіруді жеңілдетті.
Төртінші тоқсанда Amazon $240–247 млрд түсім күтеді, яғни өсім 12–16% болмақ. Операциялық пайда $28,5–33,5 млрд аралығында болжанып отыр. Компания басшысы бұлттық бизнесті қалай құрғанын Энди Джасси досьесінен оқыңыз.
Дереккөздер: Amazon — 2026 жылғы үшінші тоқсан есебі, TechCrunch — нәтижелер мен талдаушылар болжамы, TechCrunch — Энди Джассидің шығын мен AWS туралы мәлімдемесі
