Емхана медиктерінің жалақысы 2027 жылдан 40%-ға дейін өседі
Үстемеақыға жылына шамамен 137 млрд теңге кетеді, оның төрттен үшін міндетті әлеуметтік медициналық сақтандыру жүйесі төлейді.
Фото: Inbusiness.kz / Pixabay
2027 жылғы 1 қаңтардан бастап емханалардың учаскелік қызмет мамандары сараланған үстемеақы ала бастайды. Сондықтан олардың жалақысы еңбек өтіліне қарай 40%-ға дейін өседі. Бұл туралы 29 қазанда үкімет отырысында денсаулық сақтау министрі Ақмарал Әлназарова айтты. Шара 77 мыңнан астам медицина қызметкерін қамтиды.
Үстемеақы мөлшері үздіксіз еңбек өтіліне және психоэмоционалдық жүктемеге байланысты болады. 40% өсімді үздіксіз өтілі ең ұзақ учаскелік мамандар алады, ал қалғандарына аздау қосылады.
2027–2029 жылдары үстемеақыға жыл сайын шамамен 137 млрд теңге қажет. Оның 34 млрд теңгесі республикалық бюджеттен бөлінеді. Ал қалған 103 млрд теңгені міндетті әлеуметтік медициналық сақтандыру жүйесі төлейді.
Денсаулық сақтау министрлігі бұл өсім алғашқы буындағы кадр тапшылығын азайтады деп есептейді. Яғни тұрғылықты жердегі медициналық көмек қолжетімді болады. Учаскелік мамандардың жалақысын өтіліне қарай көтеруді президент Қасым-Жомарт Тоқаев халыққа Жолдауында тапсырған. Сол сөзінде ол ең төменгі жалақыны 110 000 теңгеге көтеруді де тапсырды.
Дереккөздер: Inbusiness — 2027 жылдан учаскелік медиктерге үстемеақы
