PS Plus қарашада Dead Island 2 мен Tomb Raider береді
Қазандағы F1 25 мен Hunt: Showdown 1896 ойындарын кітапханаға 2 қарашаға дейін ғана қосуға болады.
Фото: PlayStation
Sony 28 қазанда PlayStation Plus жазылушыларына арналған қарашадағы ойындарды жариялады. Тізімге Dead Island 2 зомби-экшені, Tomb Raider IV–VI Remastered жинағы және Monster Train 2 карта роглайты кірді. Үш ойынды да 3–30 қараша аралығында алуға болады. Ол үшін жазылымның кез келген деңгейі, соның ішінде базалық Essential те жеткілікті.
Dead Island 2 PS5 пен PS4 нұсқаларында шығады. Оқиға ашық әлемде, Лос-Анджелесте өтеді. Зомби індетінен кейін қаланы HELL-A деп атап кеткен. Ойыншы тапсырма орындайды, аман қалғандармен танысады, ерекше суық қарумен шайқасады. Науқанды желі арқылы үш адам бірге өтуге болады.
Tomb Raider IV–VI Remastered та PS5 пен PS4-те қолжетімді. Жинаққа The Last Revelation, Chronicles және The Angel of Darkness енді. Алғашқы екі бөлім PS1-де, үшіншісі PS2-де шыққан. Түпнұсқа полигон графикасы мен жаңартылған графиканың арасында кез келген сәтте ауысуға болады.
Monster Train 2 жазылымда тек PS5-те шығады. Бұл карта колодасымен ойналатын жалғыз адамға арналған роглайт. Ойыншы бұрынғы періштелер мен жындардың кландарын Тозақ, Аспан және Тұңғиық арқылы бастап, Титандарды құлатуы керек. Ойында бес клан бар. Push Square дерегінше, ДК нұсқасы Metacritic-те 87 балл алған.
Ойындар жазылым жұмыс істеп тұрғанда кітапханада қалады. Алайда оларды ай ішінде аккаунтқа қосып үлгеру керек. Қазандағы F1 25, Hunt: Showdown 1896 және Earth Defense Force: World Brothers 2 ойындарын дүйсенбіге, 2 қарашаға дейін алуға болады. PS Plus-тың келесі ойындары 1 желтоқсанда шығады. PlayStation-ның артында тұрған компанияның тарихын Sony досьесінде талдадық.
Дереккөздер: PlayStation Blog — PS Plus-тың қарашадағы ойындары, Push Square — 2026 жылғы қарашадағы PS Plus Essential тізімі
