GTA 6 PS5-те 210 ГБ орын алады: датамайнер дерегі
Сол ақпарат бойынша алдын ала жүктеу 12 қарашада, ойын шығудан бір апта бұрын ашылады.
Фото: Rockstar Games
Grand Theft Auto VI PlayStation 5-те шамамен 210 ГБ орын алады. Мұны X әлеуметтік желісінде Sony базасындағы ойындардың көлемін бақылайтын PlayStation Game Size датамайнері жазды, ал Insider Gaming сайты бұл мәліметті растады. Rockstar Games ойынның көлемін ресми түрде айтқан жоқ. GTA 6 19 қарашада шығады.
Сол дереккөздің айтуынша, алдын ала жүктеу 12 қарашада басталады, ал ойынның өзі шығатын күні түн ортасында ашылады. Оның жазбасында стандартты басылым $79,99 тұрады. 210 ГБ дискідегі түпкі орынды білдіре ме, әлі белгісіз. Себебі орнатушыға көбіне ойынның өз көлемінен бөлек уақытша кеңістік керек.
Консоль дискісінің жартысына жуығы
Бұл Rockstar-дың алдыңғы ірі ойыны Red Dead Redemption 2-ден 61 ГБ көп. IGN жазғандай, 2018 жылы оған PS4-те 149 ГБ бос орын керек болған. Салыстыру үшін, 512 ГБ жинақтауышы бар Xbox Series S-те пайдаланушыға шамамен 362 ГБ қолжетімді. Яғни GTA 6 оның жартысынан көбін алар еді.
Insider Gaming бірінші күні жүктеу көлемін тағы ұлғайтатын патч шығуы мүмкін деп ескертеді. Базалық жинақтауышы бар консоль иелері басқа ойындарды өшіруге немесе қосымша SSD сатып алуға мәжбүр болуы ықтимал. Ал интернеті баяу ойыншыларға шығудан бір апта бұрынғы алдын ала жүктеу уақыт қорын береді.
Rockstar GTA 6 шығуын бұған дейін кейінге шегерген, енді ойын 19 қарашада шығады. Студияның өз қиындығы да бар: GTA 6-ның британдық әзірлеушілері ойын шығар кезде кәсіподақ құру үшін дауыс береді. Серияға жауап беретін адам туралы толығырақ — Rockstar негізін қалаушы Сэм Хаузер досьесінде.
Дереккөздер: Engadget — PlayStation Game Size пен Insider Gaming дерегі бойынша GTA 6 көлемі
