Instagram YouTube-қа қарсы 90 минуттық бейнені сынап жатыр
Reels-тегі қысқа ролик толық шығарылымға апаратын есікке айналады: көрермен қосымшадан шықпай-ақ оған бір түртумен өте алады.
Фото: 9to5Mac
Instagram ұзақтығы 90 минутқа дейінгі көлденең бейнеге арналған Features форматын сынай бастады. Бұл туралы 26 қазанда The Hollywood Reporter хабарлады, ал оның дерегін 9to5Mac келтіреді. Формат подкастерлерге, комиктерге және ұзақ шығарылым жасайтын басқа авторларға арналған. Осылайша Instagram YouTube алаңына шықты.
Features алдымен Бразилияда сыналды, енді АҚШ-тағы жекелеген авторлар қолжетімділік алып жатыр. Автор толық бейнеге әдетте үш минутқа дейін созылатын қысқа Reels-терін байлай алады. Көрермен Reels-те подкаст үзіндісін көрсе, қосымшадан шықпай-ақ әрі қарай көре береді немесе бірден толық шығарылымға өтеді. Ұзақ бейнелерді Instagram «Қызықты» бөлімінде және басқа жерлерде ұсынады.
Авторларға табыс
Монетизация туралы мәлімет әзірге аз. Instagram-ның өнім жөніндегі вице-президенті Тесса Лайонстың айтуынша, танымал авторлар жаңа форматқа өздерінің демеушілік келісімшарттары мен жарнамалық интеграцияларын ала келе алады. Оның сөзінше, Instagram-да «мұндай инфрақұрылымы әлі жоқ авторларға көмектесуге үлкен мүмкіндік бар». Бұл нақты қалай жұмыс істейтінін компания нақтыламады.
Instagram ұзақ бейнені бұрын IGTV-де сынап көрген. Алайда формат тамыр жаймады, ал қосымша Reels-ке бет бұрғанда жабылды. Енді есеп басқа: стендап пен бейнеподкасттардың қысқа үзінділері көрерменді ұзақ шоуларға жетелейді. Сол аудитория үшін Netflix пен Disney де күресіп, блогерлердің контентін өз платформаларына алып жатыр.
Features Instagram-ның түрлі құрылғыдағы подкаст пен ұзақ бейнеге қатысты кеңірек жоспарына енеді. АҚШ-та компания Apple TV-ге арналған Instagram for TV қосымшасын шығарып қойды. Features-ті басқа елдерде, соның ішінде Қазақстанда, қашан іске қосатынын Instagram әзірге хабарлаған жоқ.
Дереккөздер: 9to5Mac — Instagram-дағы Features форматының сынағы туралы
