НБА Kalshi мен Polymarket-ті ресми серіктес етті
НФЛ басқа жолды таңдады: ол АҚШ Жоғарғы сотында мұндай келісімшарттарды штаттар бақылайтын құмар ойын деп дәлелдеп жүр.
Фото: The Block
НБА 26 қазанда болжамдар нарығына ресми жол ашты. Лига АҚШ-тың Тауарлық фьючерстер саудасы жөніндегі комиссиясымен (CFTC) өзара түсіністік меморандумына қол қойып, Kalshi мен Polymarket-ті өзінің «басым болжамдар нарығы биржалары» деп жариялады. Сонымен қатар лига DraftKings букмекерімен бұрынғы келісімін кеңейтті: енді ол мұндай нарықтарды да қамтиды.
Kalshi мен Polymarket НБА символикасын пайдалану, маркетинг және АҚШ медиасында жарнама жүргізу құқығын алды. Келісімшарттарды есептеуге қажет ресми матч деректерін оларға Sportradar береді, лига оны деректер тарату серіктесі етіп тағайындады. Мәмілелердің қаржылық шарттары жарияланған жоқ. Алдағы апталарда НБА басқа букмекер серіктестерімен де осындай келісімдер жасамақ.
Есесіне лига адал ойын ережелерін енгізеді. Рұқсат етілетін нарықтардың тізімі шектеледі. Лига мен клуб қызметкерлеріне НБА оқиғаларына арналған келісімшарттармен сауда жасауға тікелей тыйым салынады. Ал алаңдар тергеулер мен күдікті мәмілелер туралы деректерді лигамен бөлісуге міндетті. Нарықтарға қойылатын шектеулер НБА-ның спорттық ставкаларға арналған соңғы ережелеріне сай болады. CFTC-мен меморандум ақпарат алмасу мен мұндай нарықтарды қадағалауға қатысты.
«Ойынның адалдығын қорғау — біздің басты міндетіміз», — деді НБА-ның медиатарату және серіктестік бөлімінің басшысы Скотт Кауфман-Росс. Ол бұл мәмілелерді жаңа сала үшін ереже қалыптастырудағы маңызды қадам деп атады.
НБА мұндай меморандумға қол қойған үшінші лига болды. Одан бұрын наурызда MLB, ал мамырда НХЛ қол қойған. НФЛ басқа жолды таңдады. Ол CFTC-тен инсайдерлік саудаға қатаңырақ бақылау талап етеді. Ал қазанда АҚШ Жоғарғы сотына пікір жолдап, спорттық келісімшарттарды штаттар бақылайтын құмар ойын деп атады. Штаттардың өзі бұл алаңдар ойын бизнесі туралы заңдарды бұзып, салықтан жалтарады деп санайды. Нью-Джерси бұл дауды Жоғарғы сот қарауын сұрап отыр.
Болжамдар нарығы спорттан тыс салада да инсайдерлік жанжалдарға ілігіп үлгерді. Сондықтан Kalshi мен Polymarket сезімтал нарықтардағы трейдерлердің жұмыс орнын тексере бастады. Мұндай алаңдар Қазақстанда да пайда болды: отандық болжамдар нарығындағы алғашқы мәмілелер туралы қазан айында жазғанбыз.
Дереккөздер: NBA.com — лиганың ресми релизі, The Block — басқа лигалардың меморандумдары, НФЛ ұстанымы және штаттармен дау
