Гарри Стайлс Лиам Пейнді еске алып, жаңа ән орындады
Стайлстың Нью-Йорктегі концерттері 31 қазанға дейін жалғасады, ал 2027 жылдың көктемінде ол 12 қаланы аралайтын стадиондық турға шығады.
Фото: Consequence
Гарри Стайлс Лиам Пейнге арнап жазған What Is Enough әнін алғаш рет көпшілік алдында орындады. Бұл 16 қазанда Нью-Йорктегі Madison Square Garden аренасында болды. Дәл осы күні One Direction тобындағы әріптесінің қайтыс болғанына екі жыл толды.
Consequence басылымының жазуынша, Стайлс әнді гитарамен жалғыз бастады. Ал әннің ортасына қарай оған топ қосылды. Ән мәтіні қайғы, өкініш және енді қайта қоңырау шала алмайтын адам туралы. Әнші оны шамамен екі жыл бұрын жазғанын айтты.
Орындар алдында музыкант залға сөз арнады. «Екі жыл бұрын дәл осы күні мен сол достарымның бірінен айырылдым», деді Стайлс. Оның айтуынша, ән шын мәнінде бір-біріне қамқор болу туралы.
Лиам Пейн 2024 жылғы 16 қазанда Буэнос-Айресте қаза тапты. Ол CasaSur Palermo қонақүйінің үшінші қабатындағы балконнан құлап кетті. Ол кезде 31 жаста еді. One Direction тобы 2010 жылы The X Factor шоуында құрылып, 2016 жылы мерзімсіз үзіліс жариялады.
Концерт Kiss All the Time. Disco, Occasionally альбомына арналған 30 шоудан тұратын Together, Together резиденциясының бөлігі. Нью-Йорктегі кештер 31 қазанға дейін жалғасады. 2027 жылдың көктемінде Стайлс бағдарламасын стадиондарға апарады. Яғни 12 қалада 40 концерт өтеді, 2 сәуірде Финикстен басталып, 28 тамызда Лондондағы «Уэмбли» стадионында аяқталады. Еуропада Берлин, Париж, Мадрид, Рим және Дублин бар. What Is Enough әнінің ресми студиялық нұсқасы әзірге шыққан жоқ.
Дереккөздер: Consequence — Стайлс Лиам Пейнге арналған әнді орындады, Consequence — Together, Together 2027 турының күндері
