Ledger әмиянына жасырын плата салынып, $93 млн ұрланды

Аппараттық криптоәмияндар шығаратын француздық Ledger компаниясы зардап шеккен клиенттің кемінде бір құрылғысынан бөгде аппараттық имплант табылғанын растады. Ұрлықтың расталған барлық жағдайы Оңтүстік-Шығыс Азиядағы CryptoBilis реселлері сатқан әмияндарға қатысты. Блокчейн сарапшыларының бағалауынша, алаяқтар 300-ден астам әмияннан $86–93 млн шығарып алған.

Әмиянның босап қалғаны туралы алғашқы шағымдар 9 қазанда Оңтүстік-Шығыс Азиядағы сатып алушылардан түсті. 10 қазанда Ledger қолдау қызметі X желісінде: «Ledger зардап шеккен пайдаланушылардың бірінің құрылғысында рұқсатсыз аппараттық имплант болғанын растай алады», деп жазды. Ақша Bitcoin, Ethereum және Tron желілерінде жоғалған. Компания шығынның ресми сомасын әлі айтқан жоқ.

Жасырын құрылғы қалай жұмыс істеді

Толығырақ мәліметті Mt. Gox биржасының бұрынғы басшысы Марк Карпелес айтты. Оның сөзінше, ол Малайзиядан айырбасталған Ledger сатып алып, оны ашып көрген. Экранның астында, әдетте дисплей төсемі тұратын жерде микроконтроллері, антеннасы, LTE-модемі және eSIM-і бар кішкентай плата орнатылған.

Карпелестің айтуынша, плата экранды бақылап, әмиян иесіне сид-фразаны көрсеткен сәтте оны ұстап алған. Сид-фраза деген 24 сөз, оның көмегімен әмиянды кез келген құрылғыда қалпына келтіруге болады. Алаяқ оны ұялы желі арқылы алған соң гаджеттің өзіне қол жеткізбей-ақ ақшаны кез келген уақытта шығара алған.

Сырттай қарап айырбасты байқау қиын. Карпелестің құрылғысы зауыттық қабығы бүтін күйде келген. Сондай-ақ ол Genuine Check деп аталатын фирмалық түпнұсқалық тексеруінен өткен, себебі ішіндегі қорғалған чип шынайы болған. Ledger имплант қалай жасалғанын әлі түсіндірмеді.

Реселлер туралы не белгілі

CryptoBilis Индонезияда, Малайзияда және Филиппинде жұмыс істейді. Ledger мәліметінше, реселлер тергеу аяқталғанша аппараттық әмияндардың бәрін сатуды тоқтатқан. Компания CoinDesk сұрауына жауап бермеді. Binance негізін қалаушылардың бірі Чанпэн Чжао X желісінде алаяқтар реселлерді сатып алып, үндемеуге міндеттеген болуы мүмкін деп жазды. Алайда бұл дерек расталмаған.

Ledger өзінің ішкі жүйелері мен тікелей сату арналары бұзылмағанын айтады. Компания билікпен бірге жұмыс істеп жатыр, реселлерлерге бақылауды тексереді. Дистрибьюторларға тауарды тек ресми арналардан алу керегін және қайтарылған құрылғыны қайта сатуға болмайтынын еске салды. Еуропадағы MediaMarkt желісінен де айырбасталған Ledger табылды деген X-тегі расталмаған хабарларға компания пікір білдірмеді.

Әмиян иелеріне не істеу керек

• CryptoBilis-тен сатып алынған жаңа әмиянды іске қоспау.
• Құрылғы бапталып қойған болса, қаражатты тікелей Ledger-ден алынған жаңа әмиянға, жаңа сид-фразамен көшіру.
• Ledger қолдау қызметіне тек ресми арналар арқылы жазу және полицияға арыз беру.

Ledger соңғы 90 күндегі сатып алуларды тексеруге кеңес береді. Bitquery сарапшылары бұл жеткіліксіз деп санайды. Себебі босаған әмияндардың 80%-дан астамына қаражат алғаш рет маусымда немесе одан кейін түскен. Яғни CryptoBilis жаздың басынан бері сатқан құрылғылар да қауіпті болуы мүмкін.

Компания оқиғаны пайдаланғысы келетін алаяқтардан да сақтандырады. Ledger ешқашан қоңырау шалмайды, жеке хабарлама жазбайды және сид-фраза сұрамайды. Ресми реселлерден сатып алу қауіпті азайтады, бірақ бұл оқиға көрсеткендей, толық кепілдік бермейді. Шілдеде ұқсас соққы Coldcard әмиянына тиген еді. Ол кезде бағдарламадағы қате әртүрлі бағалау бойынша $100–130 млн биткоинды шығарып алуға мүмкіндік берді.

Дереккөздер: CoinDesk — Ledger мәлімдемелері және шығын көлемі, Help Net Security — имплант құрылымы және Bitquery бағалауы